Fframwaith Gweithredu Ymyraethau

Cam Un:

Pan fydd gan riant, ofalwr ac/neu athro dosbarth bryder am blentyn unigol, ein hymateb cychwynnol yw darparu strategaethau addysgu o ansawdd uchel, sgaffaldiau dysgu, a gwahaniaethu o fewn y dosbarth. Yna caiff cynnydd y plentyn ei fonitro'n rheolaidd gan yr athro dosbarth. Gall yr athro dosbarth ddefnyddio cynorthwywyr dysgu i gynorthwyo dysgu’r plentyn yn y dosbarth, neu drwy gynnal ymyrraeth dosbarth. 

Cam Dau: 

Os nad yw dysgwr yn datblygu yn ôl y disgwyl, mae’n bosibl y bydd angen ymyraethau wedi’u targedu i ategu addysgu gwahaniaethol, a hynny er mwyn mynd i’r afael â meysydd angen penodol. Mae hyn yn elfen sylfaenol o addysgu ansawdd uchel, arferol. Bydd cyfuniad o addysgu ansawdd uchel gydag ymyraethau effeithiol, byr, am gyfnod penodol, yn ddigon i’r rhan fwyaf o ddysgwyr ddatblygu yn unol â’u potensial. 

Os bydd cynnydd yn parhau’n araf mewn perthynas â gallu’r plentyn, gall athro dosbarth gyfeirio’r dysgwr at Dîm Cefnogi Dysgu'r ysgol. Bydd y Tîm Cefnogi Dysgu yn cynllunio ymyraethau addas er mwyn ymateb i’r meysydd penodol sydd yn peri pryder, yna, bydd sesiynau’n cael eu hamserlennu er mwyn cynorthwyo dysgu’r plentyn (e.e., sesiynau Dysgu Dwys un i un, neu waith grŵp). Mae hon yn elfen sylfaenol, ond arferol, o addysgu ansawdd uchel.

Hefyd, pan fydd angen cymorth ychwanegol i ddatblygu arfer ysgol, neu i fynd i’r afael ag anghenion unigol dysgwr, bydd Cydlynydd Anghenion Dysgu Ychwanegol (CADY) yr ysgol yn cydweithio ag asiantaethau allanol a thimoedd arbenigol yr Awdurdod Lleol (ALl), gan gynnwys gweithwyr iechyd proffesiynol y GIG. 

Cam Tri: 

Pan fydd y cynnydd yn llai na’r disgwyl, mae’n bosib na fydd addysgu o ansawdd uchel, gan gynnwys gwahaniaethu ac ymyraethau arferol, safonol, yn ddigon i fodloni anghenion pob dysgwr. Mae’n bosib y bydd dysgwyr o’r fath yn cael eu hamlygu’n rhai sydd ag Anghenion Dysgu Ychwanegol (ADY) a bydd angen i’r ysgol gymryd rhai camau ychwanegol neu wahanol i sicrhau cynnydd. Bydd penderfynu a oes gan ddysgwr ADY yn seiliedig ar asesiad o gynnydd dros amser, o ystod o ffynonellau. 

Anghenion Dysgu Ychwanegol (ADY)

Tîm Cefnogi Dysgu:

Anogwyr Dysgu: Mr Thomas Sims-Hayes a Mrs Ingrid Morgan

Uwch-anogwyr Dysgu: Mrs Rhiannydd Jones, Mrs Mari Hughes a Ms Rhoda Henson

Rhaglenni Ymyrraeth:

Gwybyddiaeth a Dysgu

Cyfathrebu a Rhyngweithio

Ymddygiad, a Datblygiad Emosiynol a Chymdeithasol

Anghenion Synhwyraidd a / neu Gorfforol